Балык Бистәсе муниципаль районы

2010 елның 9 марты, сишәмбе

Сәхнәләрдә яз балкышы

Матур булырга охшаган быел яз. Хисләргә баеп, илһамланып кердек без аңа. Иңәүвәл район Мәдәният йортында “Созвездие-Йолдызлык–2010” бәйгесендә катнашучыларны сәламләсәк, 2 мартта җөмһүриятебез Камал театры артистларының сәнгатьне яратучы район тамашачысы белән очрашуы күңелгә янә бер җылы тәэсир өстәде.

Ф.Каюмова

“Туган ягым, Балык бистәм минем,

Ай-һайлар да татлы як бит ул...”

Туган җиргә мәдхия булып яңгыраган әнә шундый шигъри юллар белән ачылды “Созвездие-Йолдызлык–2010”. Алып баручылар Күгәрчен мәктәбеннән Сиринә Мукриева белән Ранис Шакиров тамашачы күңелен җирсүле тойгыларга төреп концерт-бәйгегә алып керделәр. Сәхнәдән җыр агылды. Районыбыз балалар бакчаларыннан, мәктәпләрдән 150 дән артык талантлы балаларны җыйган әлеге бәйге чын мәгънәсендәҗыр бәйрәменәәверелде. “Вокал-соло”, “Хореография”, “Конферанс” номинациясендә чыгыш ясаучылар яшьләре буенча кече, урта, өлкән төркемнәргә бүленгән иде. Балалар бакчаларына йөрүче нәниләр дә, мәктәп укучылары да дулкынландыргыч мизгелләр кичерделәр бу минутларда. Әмма барысының да сәхнә иркенлеген тоеп матур итеп чыгыш ясаулары, җырдагы хис-кичерешләрне тамашачыга җиткерергә омтылулары күңелне сөендерде.

Җиңүчеләрне ачыклау өчен ТР Президент аппараты каршындагы мәдәниятны үстерү фонды җитәкчесе Нурия Вәлиуллина, Казан дәүләт мәдәният һәм сәнгать университеты педагогы Венера Шәмиева, ТР халык артисты, дәүләт җыр һәм бию ансамбленең баш балетмейстеры Раилә Гарипова, шул ук ансамбльнеңәйдәүче солисты Айдар Сөләйманов, районыбыз “Дельфин” спорт-сәламәтләндерү комплексы директоры Рәмзия Вәлиева кебек мәртәбәле жюри билгеләнгән иде. Шуңа да музыкаль яктан җырның ничек башкарылуы, хореграфик биюләр, нәфис сүз осталыгын бәяләү аларның гадел хөкемендә булды. Һәр номинация буенча җиңүчеләр ачыкланды. Алар исә 15-16 мартта Чирмешәндә узачак “Созвездие-Йолдызлык 2010” зона турына барачаклар. Ә районкүләмендә катнашкан һәр конкурсантка да район яшьләр яше, мәгариф бүлеге һәм район мәдәният бүлегенең Дипломнары тапшырылды, һәммәсе дә Нурия Вәлиуллина алып килгән махсус бүләкләргә ия булдылар. Конкурсны үткәрүдә район балалар иҗат үзәге (директоры Р.Иминева) хезмәткәрләре тарафыннан да зур булышлык күрсәтелде.

Бу көн балалар хәтерендә кайта-кайта яңарыр әле. Алар исеменәәйтелгән мактау сүзләре аларның талантын үстерергә этәрер, үз өсләрендә яңадан эшләргә рухландырыр.

“Театр – яктылыкка, нурга илтә...”

Г.Камал театры артистларының районыбыз тамашачысы белән очрашуы йөрәктән-йөрәккә күчкән җыр-моңның дәвамы булды кебек. Балыкбистәлеләр өчен Камал театры артистлары күптән инде үз кеше. Безнең район әлеге театрга Рәсәй, җөмһүрият сәнгать дөньясында танылган Рауза Хәйретдинова, Равил Шәрәфиев, Хәлим Җәләлов кебек олы сәхнә артистларын биргән төбәк. Алар янәшәсендә якташыбыз Алик Фазылҗановның да булуы безнеңөчен янә бер горурлык. Кунаклар алдында чыгыш ясаган район хаимияте башлыгы Илһам Вәлиев бу хакта ассызыклап узды, районыбызда алмашка үсеп килүче талантлы яшьләрнең күп булуына куанычын белдерде.

Әйе, районыбыз талантларга бай. Әлеге очрашуда да Урахча мәктәбеннән Ләйсән Гәрәева, Марсель Ибраһимов, Күгәрченнән “Бәхетле балачак” фольклор ансамбленең чыгышлары кунаклар күңеленә хуш килде. Соңрак сәхнә күген Камал театры артистлары балкытты. Драматург Т.Гыйззәтнең мәңге тутыкмас “Чаткылар”ыннан өзек уйнаган Р.Шәрәфиев, Х.Җәләлов, Ф.Әкбәрованы тамашачы көчле алкышларга күмде. Әсхәт Хисмәтов, Алмаз Гәрәев, Гүзәл Минакова, Ирек Кашаповның, Алик Фазылҗановныңҗыр-биюләре, Луара Шакирҗанованың нәфис сүз осталыгында концертны алып баруы һәркемдә дә соклангыч хисләр уятты. Аларның чыгышы сәнгатькә юл ярып килүче, сәхнәгә тәүге адымнарын атлаган яшьләр, мәктәп укучылары өчен үзе бер күркәм өлге булды.

Район хакимияте тарафыннан сәнгатьне үстерүгә зур игътибар бирелә. Республика күләмендә уздырылган смотр-конкурсларда катнашып, безнекеләрнең лауреат булып кайтулары да шуның бер дәлиле. Җөмһүриятебезнең йөзек кашы саналган Г.Камал театры артистларының районыбыз тамашачысы белән әлеге очрашуы исә ике арадагы сәхнә дуслыгын тагын да ныгытыр дигән ышанычны арттырды.

Җаваплы һәм тыйнак хезмәткәр

Җитәкчеләре аны бер дә шулай тиз генә лаеклы ялга җибәрәселәре килми. Бүгенге күзлектән караганда бик зур бәя бу. Чөнки иминият хезмәткәре өчен кешелеклелек, авыл кешеләре белән бик тиз уртак тел таба белү генә түгел, сау-сәламәт булу да бик кирәк. Ә менә соңгысы Галина Ивановна Слеповага җитешми дә инде.

В.николаев

Трой-Урай һәм Гремячка авылында яшәүчеләр Галинаны йомшак күңелле һәм кешене аңлый белү сәләтенә ия булганы өчен бик тиз яратып үз иттеләр. 20 елдан артык бу хезмәттә эшләве дәверендә авылдашлары да аны бик яхшы өйрәнделәр. Ә халык хөрмәтен яулау гына түгел, аны югалтмыйча саклый белү дә бик кирәк. Чөнки төрле характерлы кешеләр бар. Һәрберсенең күңелен таба белү, һәркайсына ярарга тырышу да кирәк бит. Галина Ивановна нәкъ шундый күркәм сыйфатларга ия булган хезмәткәр дә инде. Менә 40 елга якын вакыт кайнанасы белән аңлашып, тату яшәве дә нәкъ шуны дәлилли.

Ә Галина Ивановна авыл халкы белән кече яшьтән үк яхшы мөнәсәбәттә эшли. “Береговой” совхозында секретарь-машинистка вазыйфасын башкарганда ук хезмәткәрләр белән бик тиз уртак тел таба белде. Шуннан соң биредә ул кадрлар бүлеге башлыгы, бухгалтер һәм икътисадчы хезмәтләрен башкарды. Шушы чорларда Лаеш авыл хуҗалыгы техникумында белемен арттырды. Ә инде 1989 елда аны иминият бүлеге агенты итеп чакырып алдылар.

–Барыннан да бигрәк 1990 нчы елларда эшләве авыр, кыен иде миңа,–дип искә ала ул үткән юлын. –Авыл кешеләренең киләчәккәөмете сүнде. Кайбер вакытларда бер йортка берничәшәр мәртәбә кереп аңлатырга, ышандырырлык итеп әңгәмәләр үткәрергә туры килде, иминиятләүнең кирәклеген дәлилләде. Ә бүген әнә бик күпләр аңа килеп рәхмәт белдерәләр. Чөнки көтелмәгән бәла-казадан берәү дә азат түгел. Авыр минутларында ире Александр Иванович та ярдәм итеп, булышлык күрсәтте. Ул озак еллар дәвамында хуҗалыкта автомобильче, ә аннан соң кино куючы булып эшләде.

–Бик җаваплы, ягымлы һәм тыйнак хемәткәр,–дип характерлады аны “Росгосстрах-Татарстан” акционерлык җәмгыятенең Балык бистәсе филиалы башлыгы Хатыйп Газизов.

–Үз эшенең бөтен нечкәлекләрен яхшы белә, акыллы белгеч,–ди агентлык төркеме менеджеры Т.Макарова аның турында. –Хисап эшләрен бик төгәл, пөхтә, үзвакытында тапшыра. Авыл кешесе белән эшли белә. Шуңа иминият планнарын да һәрвакыт арттырып үти. Коллективта бик зур абруй казанды ул. Шулай тиз арада лаеклы ялга китүе генә кызганыч.

Ә Галина Ивановна үз эшен уңышлы төстә дәвам иттерүчесен дә тапкан. Эстафетасын сеңлесе Светлана Галяминага ышанып тапшырган. Ул үзара дус, бердәм иминиятчеләр коллективына үтеп керергәөлгергән инде. Мөгаен, сынатмас та. Ни дисәң дә, кыен вакытта аның ышанычлы киңәшчесе бар бит.

Кышның соңгы ярышлары

Һәр ял көнне диярлек “Дельфин” спорт комплексында төрле спорт ярышлары үткәрелә. Узган якшәмбе көнне биредә хоккей һәм волейбол турнирлары булды.

В.Родионов

Сезонны төгәлләп

Ата-аналар Кубогына хоккей турниры быел икенче мәртәбәүткәрелде. Алар хәзер традицион рәвештә уза һәм бу шатлыклы күренеш. Күптән түгел Балык бистәсе Кубогына, Ямаш авылында бертуган Гыйльметдиновлар Кубогына, Күгәрчендә сугышчы-интернационалист Р.Гыйниятуллин Кубогына хоккей ярышлары булып узды. Шулай да ата-аналар Кубогы алардан аермалырак. Беренчедән аны ата-аналар оештырды. Алар өчен хоккей мавыктыргыч уен гына түгел, күпләр бу уенны җан-тәннәре белән яраталар. Хәзер менә бозга аларның балалары, хәтта оныклары да чыккан.

–Без барыбер районның спорт данын тиешле югарылыкка күтәрәчәкбез. Ул төрле спорт төрләре буенча республикада лаеклы урын алачак,–диде район башлыгы И.Вәлиев турнирны ачып. –Сез безнеңөметебез, киләчәгебез. Барыгызга да матур, гадел уен телим.

–Елдан-ел хоккей безнең районда үсеш ала,–дип дәвам итте ярышларның төп оештыручыларыннан берсе Р.Имамов. –Безнең яхшы спорт традицияләребез бар. Шунысы кызганыч, әлегә хоккей турнирларында, кагыйдә буларак, районның көнчыгыш зонасыннан гына балалар катнаша. Ә бит кайчандыр Масловка, Олы Елга, Рус Әшнәге малайлары да хоккейны яхшы уйныйлар иде. Аларга да кулларына кәшәкә тотарга вакыт җиткәндер, мөгаен.

Бу турнирда төп приз–ата-аналар Кубогын 1995-97 елларда туган спортчылардан торган Күгәрчен, Котлы Бөкәш, Ямаш, Урахча, Тегермәнлек һәм “Дельфин” спорт комплексы командалары дәгъваладылар. Уеннар башланыр алдыннан район башлыгы И.Вәлиев команда тренерларына Мактау грамоталары һәм кыйммәтле бүләкләр тапшырды. Бу очраклы хәл түгел, алар хоккейга булган тугрылыклары, тырыш хезмәтләре, яшь спортчылар тәрбияләүгә керткән өлешләре белән хөрмәткә лаеклылар.

Ниһаять бозга алка ташланды. Яшь хоккейчылар үзләренең бөтен осталыкларын, батырлыкларын күрсәтергә тырышып уйнадылар. Аларга җанатарлар–ата-аналар, дуслары һәм авылдашлары көч-куәт биреп тордылар.

Бу турнир һәрвакыт иганәчеләр хисабына оештырыла. Быел аңа район башлыгы И.Вәлиев, ООО “Круг” җитәкчесе Ю.Караганов, “Дельфин” спорт комплексы директоры Р.Вәлиева, “Агрохимсервис” җитәкчесе А.Сафин, “РАФ плюс” төзелеш фирмасы директоры Р.Йосыпов, Н.Фәсхетдинов, Р.Гарипов (ООО “Тонус”), шулай ук Р.Шәфигуллин, М.Мәннанов, Р.Шәрәфетдинов, Р.Гадеев, Р.Сираев, М.Мифтахов матди ярдәм күрсәттеләр. Турнирда катнашучы бер генә яшь хоккейчы да бүләксез калмады.

Бу ярышлар кышкы спорт сезонын лаеклы рәвештә тәмамлау да булды. Әҗиңүне “Дельфин” командасы (тренер Ә.Пулатов) яулады. Тегермәнлеклеләр–икенче, күгәрченлеләр өченче урынга чыктылар. Җиңүчеләргә бүләкләрне турнирны оештыручы Р. Имамов һәм ООО “Круг” җитәкчесе Ю.Караганов тапшырдылар.

Волейбол турниры

Шул ук көнне спорт комплексның иркен залында Татарстан республикасының атказанган тренеры Николай Иванович Гаврилов хөрмәтенә волейбол турниры узды. Бу хәйрия ярышы беренче ел гына үткәрелми. Шәкертләре яраткан тренерларын онытмыйлар. Кызганычка каршы, ул хәзер каты авырый. Турнирдан кергән барлык акчалар да аны дәвалауга тотылачак.

Балыкбистәлеләр үз һөнәренә тугрылыклы булган Н.Гавриловны яхшы беләләр һәм хөрмәт итәләр. Ул озак еллар яшьләрдә спортка мәхәббәт тәрбияләде. Аның дәресләре бушка узмаган. Әлеге турнир да шуны дәлилли. Николай Гаврилов шәкертләре арасында республикага танылган кешеләр байтак. Мисал өчен якташыбыз, Дәүләт Думасы депутаты Х.Камалов һәрвакыт үзенең элеккеге тренерын Ватанны саклаучылар көне белән тәбрикли.

Быелгы турнирда район үзәк больницасы, ДЮСШ, “Сапсан” автосалоны, ПК-85, район мәгариф бүлеге, район газ эксплуатацияләү службасы оешмасы һәм Тегермәнлек җыелма командасы катнаштылар. Ярышлар башланыр алдыннан волейболчыларны район башлыгы И.Вәлиев сәламләде.

–Без андый фидакарь кешеләрне онытырга тиеш түгел. Үзләренең тырыш хезмәтләре белән хөрмәт яуладылар алар,–диде ул. –Сезгә күтәренке күңел, кызыклы уеннар телим.

Николай Гаврилов хөрмәтенәүткәрелгән чираттагы турнир беренче минутлардан ук җанатарларны киеренкелектә тотты. Җиңүчеләргә призлар, бүләкләр бирелмәсә дә, анда катнашучылар мораль канәгатьләнү, шатлык хисләре кичерделәр. Бәйгене үткәрүдә И.Тимофеев һәм Е.Лылов химаячелек иттеләр. Әҗиңүне район үзәк больницасы командасы (капитан Б.Әминов) яулады.

БАРЛЫК ЯҢАЛЫКЛАРНЫ УКУ

СӘХНӘЛӘРДӘ ЯЗ БАЛКЫШЫ