Балык Бистәсендә яшәүче Ләйлә Мусина “Авылның иң яхшы хат ташучысы” номинациясендә җиңүгә лаек булды

Бүген “Татмедиа” агентлыгында 2016 нчы елның 2 нче яртыеллыгына матбугатка яздыру нәтиҗәләре буенча иң яхшы хат ташучылар һәм почта элемтәсе бүлекләре билгеләп үтелде. Аларны “Татмедиа” акционерлык җәмгыяте агентлыгы генераль директоры Андрей Кузьмин бүләкләде.

 

Балык Бистәсе Полянка авылы хат ташучысы Ләйлә Мусина “Авылның иң яхшы хат ташучысы” номинациясендә җиңүгә лаек булды. 295 хуҗалыклы авылда почтальон булып ул әле ике ел гына эшли. “Эшемнең авыр мизгеләре дә бар, әмма ул авырлыкны җиңел моментлар белән уздырып җибәрәсең. Яздыру вакытында эш тыгызрак, пенсиясен дә бирергә кирәк. Бөтенесе бер вакытта. Көненә 6 сәгать йөрергә туры килә. Буранлы вакытта озаграк та була. Газета-журнал аралаганда, өләшкәндә куллар да пычрана инде, тик ул куанычлы пычрак. Андыйны гына уйламыйбыз”, - диде ул һәм шушы һөнәрдә эшләргә җыенуын әйтте.

 

Ләйлә Мусина әйтүенчә, матбугатка язылуга халыкны артык озак үгетләргә кирәкми. “Халык сиңа ияләнгәч, языла. Яңаларын сорый. Үрнәк итеп берәр яңа басма алып киләсең икән, алар аны укый, ошатканнарын яздыра.