Чикләвек ватмасаң, төшен ашый алмассың

Мөхетдиновлар гаиләсе егерме ел элек Починок авылына килеп төпләнә. Фидания апа ярдәмчел хуҗалыкта бухгалтер булып эшкә керә. Рәмзис абый механизатор булып урнаша. Яшьтән әтисез калып, эшкә өйрәнеп үскәнгәме, алар икесе дә тырышлар, нинди генә эшкә алынсалар да,  курыкмый тотыналар. Рәмзис абый трактор сатып ала. Чапкычын, печән җыя торганын да булдыра. Заманалар үзгәреп, колхозлар таркалганнан соң,  бертуганнары–фермер Фәнил  абыйга ярдәм итә башлыйлар. Фидания апа исәп-хисап эшен алып барса, Рәмзис абый җир эшкәртә. Бүген алар үз гаилә фермаларын булдырган. Хуҗалыкларында җиде сыер асрыйлар, аның янында җиде бозауы бар. 

 

Без килгәндә Рәмзис абый абзар-курада кайнаша иде. Күңеле бүген күтәренке, сөенечле хәбәре дә бар. Ике сыеры бозау китергән. “Икесе дә матурлар, нык булырга ошыйлар малкайлар. Исән-сау үссеннәр генә инде. Тагын өч сыерның бозаулыйсы бар әле”,–диеп безне каршы алды ул.  Абзар арты абзар тезелеп киткән. Янәшәдә генә  кардасы бар. Берничә сыер һәм бозавы аязда йөри. Ә бер почмактагы сарае әллә ничә төргәк печән, капчык-капчык икмәк белән тулган. Икмәк тарту өчен үзенең тегермәне бар. Малларны бер ел ашату өчен 120 төргәк печән, 7-8 тонна икмәк әзерләгән алар. “Мал асрап табыш алып буламы авылда?”,–дип сорыйм. “Була, ләкин бер дә җиңел эш түгел. Күршедәге бер урынлык участокны сатып алдык. Шуның кадәр малны тоту, печән, икмәген урнаштыру өчен кредит алып берничә зур абзар эшләдек. Күрше әбинең буш участогында яшелчәләр үстерәбез, әбигә дә өлеш чыгарабыз”,–ди хуҗа. 

Гөлназ Зарипова.

 

Автор фотосы.