Балык Бистәсе муниципаль районы

2010 елның 17 апреле, шимбә

Машиналар эшкә әзер

Күптән түгел район юл хәрәкәте иминлеге дәүләт инспекциясе хезмәткәрләре Балык бистәсе “Агрохимсервис” җаваплылыгы чикләнгән җәмгыятьнең автомашиналарына техник карау үткәрделәр.

В.Родионов

Районыбызда иң эреләрдән саналган оешманың территориясе куәтле “КамАЗ”лар һәм махсус автомашиналар белән тулган иде. Биредә барлыгы 28 “КамАЗ”, 2 төягеч, 8 трактор исәпләнә. Алар районда гаять зур күләмдә эш башкаралар.

Быел, мәсәлән, прицеплы 8 “КамАЗ” район хуҗалыклары кырларына Яншык карьерыннан известь ташыячаклар. Ә махсус җиһазландырылган 5 машина аны ачы туфраклы кырларга тарату белән шөгыльләнәчәк. Бу мөһим эш 6 мең гектар мәйданда башкарылачак. Агрохимиклар шулай ук авыл юлларына вак таш ташыячаклар, “Каздорстрой” юлчыларын вак таш һәм ком белән тәэмин итәчәкләр. Болардан тыш “Агрохимсервис” хуҗалыкларга минераль ашламалар ташуны дәвам итә. Бу оешманың үз ярдәмче хуҗалыгы да бар бит әле. Ул да уңышлы гына эшләп килә. Хуҗалык карамагында 2 мең гектар җир, 350 баш мөгезле эре терлек һәм 250 баш дуңгыз бар.

–Без язгы-җәйге сезонга тулысынча әзер,–ди оешма директоры А.Сафин. –Коллективыбыз, нигездә, үз эшен яхшы белүче, тәҗрибәле хезмәткәрләрдән тора. Күбесенең 20 елга якын эш тәҗрибәләре бар. Эш күләме дәҗитәрлек. Бары тик тырышлык кына кирәк. Инициатива күрсәтеп эшләгәндә, кризис та куркыныч түгел.

Бу көнне агрохимиклар техник карауны уңышлы үттеләр.

Ветераннарга бүләк

Бөек Ватан сугышы ветераннарын хөрмәтләп зур тантаналар үткәрелә. Шушы көннәрдә генә аларга республикабыз хөкүмәте бүләкләрен тапшыру чарасы да бәйрәм төсендәүтте.

В.Родионов

Мондый тантаналар авыл җирлеге башлыклары, киңҗәмәгатьчелек һәм район җитәкчеләре катнашында уза. Чәршәмбе көнне муниципаль район башлыгы урынбасары Рөстәм Гыйльманов та мондый мактаулы миссиядәөч авыл җирлегендә катнашты.

Анатыш авылы Мәдәният йортында олы җанлылык. Залда авылның өлкән яшьтәге иң хөрмәтле, абруйлы, үз гомерләрендә күпне күргән ветераннары утырышкан. Анда иң элек муниципаль район башлыгы урынбасары Рөстәм Гыйльманов Бөек Җиңү көнен якынайтуда куйган хезмәтләре өчен ветераннарга рәхмәт әйтеп, тәбрикләү сүзе белән чыгыш ясады.

–Сез үзегезнеңҗиңел булмаган тормыш юлыгызда зур хөрмәт казанырлык һәм күпләрне сокландырырлык хезмәт куйдыгыз. Барыгыз да Бөек Җиңү көнен якынайту өчен уртак максат белән тырыштыгыз. Киләчәк буын вәкилләре боларның барысы өчен сезгә бурычлы. Ә бу бәйрәм алды күчтәнәчләрен куйган намуслы хезмәтегез өчен бездән рәхмәт йөзеннән кабул итегез.

Дәүләт күчтәнәчләрен ветераннарга тапшырганда аларның күзләрендә сөенечле яшь бөртекләре җемелдәде. Чыннан да яшьлек чорларында утлар, сулар кичкән бу ветераннарга күп тә кирәкми кебек. Кайгыртучанлык, игътибар һәм күңел җылысына мохтаҗ алар.

Ахырда авыл үзешчәнәре һәм мәктәп коллективы олы концерт программасын күрсәттеләр. Анда аларның күбрәк яшьлек елларында яраткан, иң популяр җырлар яңгырады. Бу көнне шундый ук бәйрәм төсендәге тантаналар Рус Әшнәгеһәм Масловка авылларында да үтте. Һәр ветеранга җылы рәхмәт сүзләре әйтелде. Ә инде сәламәтлекләре какшау сәбәпле, бу чарада катнаша алмаучыларга аны өйләренә барып авыл җирлеге җитәкчеләре тапшырдылар.

Күз яшьләре аша рәхмәт

Бөек Җиңү көне якынлашкан саен авыл җирлекләрендә берсеннән-берсе күңелле һәм моңсу чаралар күбрәк оештырыла. Билгеле инде аларда хөрмәтле сугыш ветераннары һәм тыл хезмәткәрләре үзәктә торалар.

И.Аметов

Бу көнне Яңа Сала авылы клубы да халык белән тулы иде. Ватанны сакларга киткән ир-егетләр урынына әби-әниләре янәшәсендә балалар да шактый күп хезмәт куйганнар. Бүген аларныңһәркайсы олы яшьтә. Шулай да әле күпләрнең йөзеннән нур бөркелеп тора. Ирле-хатынлы Исламия апа белән Әгъзәмулла абый Шәфигуллиннар икесе дә хуҗалыкта хезмәт куйганнар. Үгез, сыер җигеп җир эшкәрткәннәр, тубал белән чәчү чәчкәннәр. Бүген аларның яшьлек чорларында күргән михнәтләрен күз алдына да китерерлек түгел. Үзләре дәәнә: «Дөньялар гына тыныч, имин булсын, без кичергәннәрне Ходай оныкларыбызга күрсәтмәсен»,– диләр.

Бу көнне Яңа Сала авылы клубына күрше Яңавыл, Чаллы авылларыннан 67 ветеран килгән иде. Аларга тантаналы төстә муниципаль район башкарма комитеты җитәкчесенең социаль мәсьәләләр буенча урынбасары Рашат Хәбибуллин һәм Биектау авыл җирлеге җитәкчеләре Татарстан Республикасы Президенты тарафыннан әзерләнгән азык-төлек пакетларын тапшырдылар.

Биектау авылы Мәдәният йортында да бу чара бәйрәмчә күңелле үтте. Иң элек залда утыручы хөрмәтле ветераннар өчен авыл яшьләре һәм мәктәп укучылары тарафыннан зур концерт тамашасы тәкъдим ителде. Шуннан соң берәм-берәм ветераннарны сәхнәгә чакырдылар.

Тыл хезмәткәре Хәсән ага Галимов та 12 яшеннән колхоз эшенә алынган. Сыерын да җиккән, терлекләр дә караган. Бераз үсә төшкәч ул механизатор һөнәре үзләштереп кыр эшләрендә катнашкан. 38 ел гомерен комбайн штурвалы артында үткәргән.

Ә Биектау авылыннан гына 350 кеше сугышка киткәннәр. Һәм аларның нибары 120 се генә туган авылларына әйләнеп кайткан. Тик ни кызганыч, бүгенгесе көнне аларның саны дүрткә генә калган. Күбесе инде өйләреннән дә чыгып йөри алмыйлар.

Районыбызның иң олы авыл җирлекләреннән исәпләнгән элеккеге Кызыл Йолдыз район үзәге Котлы Бөкәштә дә бәйрәм күчтәнәчләре тапшыру тантанасына шактый күп халык җыелган иде. Авыл җирлеге башлыгы Илдар Фәтхетдинов белән район хакимияте вәкиле Рашат Хәбибуллин сугыш ветераннарын һәм тыл эшчәннәрен сәхнәгә чакырып бик олылап хөкүмәт бүләкләрен тапшырдылар. Бу көнне биредә 164 ветеран хөкүмәт тарафыннан әзерләнгән күчтәнәчләр алды. Әлбәттә, күпне күргән хезмәт ветераннары да сүзсез калмадылар.

–Бөек Ватан сугышы башланганда 17 яшьлек агроном идем,–дип башлады сүзен тыл батыры Фатыйма апа Йосыпова. – Әле дә авыллар буенча язгы кыр эшләренәәзерлекне тикшереп йөрүләрем хәтеремдә. Бер авылның ындыр табагы янәшәсендә йөргәндә ачлыктан шешенгән балаларны күреп йөрәгем әрнегән иде. Элеккеге хезмәтләребезне онытмыйча, даими рәвештә кайгыртып торулары өчен җитәкчеләребезгә рәхмәт,- дип, ул сөенечле күз яшьләрен сөртеп алды.

Күгәрчен авылы Мәдәният йортында да хөкүмәт күчтәнәчләрен тапшыру тантанасы зур оешканлык белән үтте. Үзләренә зур игътибар, хөрмәт күрсәтүләре өчен һәркайсының сөенечтән күңелләре тулды. Балачактан ук өлкәннәр белән бер дәрәҗәдә эшләп, аларныңһәркайсы җиңү көнен якынайту өчен тырыш хезмәт куйганнар. Хезмәт ветераннары Хәтимәәби Хәмитова белән аның абыйсының хатыны Сәхипкамал әби Галиева бүген икәүдән-икәү бер йортта гомер кичерәләр. Ә менә авыр сугыш чорында хат ташучы булып эшләгән Сания апа Әүхәдиева авыл кешеләренә кайгылы хатлар гына түгел, сугыш бетү хәбәрен дә алып кайтып ирештергән. Бу көнне авыл Мәдәният йортына 70 тән артык ветеран килгән иде. Тантанада укучылар да катнаштылар. Авыл үзешчәннәре һәм мәктәп коллективы ветераннар хөрмәтенә зур концерт программасы әзерләгәннәр. Соңыннан һәр укучы бала ветераннарның азык-төлек пакетларын күтәрешеп өйләренә озаттылар. Ә авырлык белән йөрүчеләр өчен махсус автомашина чакыртылган иде.

Шушындый ук бәйрәм алды тантаналары районның башка авыл җирлекләрендә дә күтәренке рухта үтте.

Янгыннарга киртә куелсын

Узган сишәмбе көнне Балык бистәсе муниципаль районының гадәттән тыш хәлләрне кисәтүһәм янгын куркынычсызлыгын тәэмин итү комиссиясенең чираттагы утырышы булды. Аны әлеге комиссиянең рәис урынбасары Р.Хәбибуллин алып барды.

И.Җамалиев

Яз көне бигрәк тә явым-төшем булмаганда янгын чыгу куркынычы бермә-бер арта. Р.Хәбибуллин хәбәр иткәнчә, Күгәрчен авылы күпере янәшәсендәге коры үләнгә кайсыдыр бер ваемсызы ут төртеп киткән дә инде. Ярый әле вакытында сүндерергәөлгергәннәр. Янгын таралып юл буендагы посадкага да кабарга мөмкин бит. Мондый күңелсез хәлләр безнең районда ел саен диярлек кабатланып тора. Комиссия әгъзалары узган ел Үрнәк авылындагы янгынның аяныч нәтиҗәләрен дә искә төшереп үттеләр. Коры үләнгә сүндермичә ыргыткан тәмәкедән, балаларның шырпы белән шаяруыннан да зур фаҗигаләр килеп чыга. Ә кайберәүләр кызык өчен генә дип тә ут төртәләр коры үләнгә. Шуныңөстенә кайбер хуҗалыкларда кырда калган салам калдыкларын, камылны яндыру гадәте бар. Күп очракта яндырыла торган участокларны караучысыз калдыралар. Нәтиҗәдә, янгын урманнарга, торак йортларга, хуҗалык корылмаларына зыян китерә.

Менә шундый хәлләрне булдырмас өчен янгынга каршы көчәйтелгән режим игълан ителде. Бу чорда авыл җирлекләре башлыкларына ирекле янгын дружиналары оештырып үз территорияләрендә дежурлык оештыру, аеруча куркыныч тудырырлык урыннарда авыл тирәләрен коры үләннән арындыру бурычы куелды. Булган янгын машиналарын, башка төрле янгын сүндерүгәҗиһазландырылган техниканы, гидрантларны төзек хәлдә тоту мөһим мәсьәлә. Янгынга каршы су сыешлыклары, елга, буаларга төшү юллары тәртиптә булырга тиеш.

Бу чорда гражданнарның урманнарга чыгып ял оештыруларын да чикләргә киңәш ителә. Ә коры үлән, камыл яндыру бары тик ныклы контроль астында гына башкарылырга тиеш. Бу җәһәттән җаваплы кешеләргә генә түгел, ә бәлки барлык гражданнардан зур җаваплылык, уяулык таләп ителә. Кайберәүләр йорт янәшәсендәүк чүп-чар яндыралар. Шул сәбәпле янгын куркынычы тудыралар.

Югарыда саналган янгыннарны кисәтү чараларын тиешле югарылыкта оештыруны контрольдә тоту өчен һәр авыл җирлегенә комиссия әгъзаларыннан җаваплы кешеләр билгеләнде.

БАРЛЫК ЯҢАЛЫКЛАРНЫ УКУ

МАШИНАЛАР ЭШКӘ ӘЗЕР