Балык Бистәсе муниципаль районы

2010 елның 11 апреле, якшәмбе

мөһим мәсьәләләр каралды

5 апрельдә Балык бистәсе муниципаль район Советының чираттан тыш 47 нче утырышы булды. Аны район Советы рәисе Илһам Госман улы Вәлиев ачты һәм алып барды. Утырыш эшендә район предприятие, оешма һәм учреждение җитәкчеләре катнашты.

Көн тәртибендәге беренче мәсьәлә–Балык бистәсе муниципаль район Советының (№ ХХХХIV-2 21.12.2009) “2010 елга Балык бистәсе муниципаль район бюджеты турында”гы карарына өстәмәләр һәм үзгәрешләр кертү турында финанс-бюджет палатасы рәисе Һ.Гәрәев чыгыш ясады.

Аннары “Татарстан Республикасы Балык бистәсе муниципаль район Советы аппараты турында”, “Балык бистәсе муниципаль район сайлау комиссиясе аппаратында, җирле үзидарә органнарында конфликтларны көйләү буенча комиссияләр турында”гы Положениеләрне раслау, Балык бистәсе муниципаль районында муниципаль хезмәткәрләр һәм муниципаль хезмәт урыннарына дәгъва белдерүче гражданнар тарафыннан керемнәр, милек һәм милек характерындагы бурычлар турында мәгълүматлар бирү, Татарстан Республикасы Балык бистәсе муниципаль районы җирле үзидарә органнарының норматив-хокукый актларына һәм норматив-хокукый акт проектларына коррупциягә каршы экспертиза үткәрү тәртибен раслау турында мәсьәләләр каралды. Алар буенча Балык бистәсе муниципаль район Советының юридик бүлеге начальнигы Ф.Караганова хәбәрләре тыңланды.

Балигъ булмаганнар эше буенча комиссиянең җаваплы сәркатибе Р.Гадеев “2010 елга ТР Балык бистәсе муниципаль район халкын наркотизациядән профилактикалау буенча максатчан программаны” раслау проекты белән таныштырды.

Утырыштагы 7 нче мәсьәлә–“2010 елда социаль ипотека системасында торак шартларын яхшыртуга кичектергесез ярдәмгә мохтаҗ гражданнарны квота кысаларындагы исемлеккә кертү турында” иде. Аның буенча район Башкарма комитеты җитәкчесенең инфраструктура үсеше буенча урынбасары Р.Гаянов чыгыш ясады.

Минзия Госман кызы Вәлиеваның Балык бистәсе муниципаль район Советы составыннан чыгуы сәбәпле, финанс-бюджет мәсьәләләре буенча даими комиссия составына үзгәрешләр кертелде. Комиссия составына Бәтке җирлегеннән депутат Фәнис Мансур улы Динмөхәммәтов сайланды.

Утырышта һәр мәсьәлә буенча тиешле карарлар кабул ителде.

Аграр тармак: йомгаклар һәм бурычлар

Атна башында район башлыгы Илһам Вәлиев район активы, оешма-предприятие җитәкчеләре, җирлекләр башлыклары белән киңәшмә уздырды. Анда көнүзәк мәсьәләләр күтәрелде. Киңәшмәдә район авыл хуҗалыгы идарәсе начальнигы И.Имамиев, район башкарма комитеты җитәкчесе вазыйфаларын башкаручы Р.Галимов, район Советы аппараты җитәкчесе Р.Билалов, район башкарма комитеты җитәкчесенең социаль мәсьәләләр буенча урынбасары Р.Хәбибуллин чыгыш ясадылар. Түбәндә киңәшмәдә авыл хуҗалыгына кагылышлы яңгыраган кайбер фикерләргә тукталырга булдык:

* * *

Алдагы ел белән чагыштырганда агымдагы елның 1 кварталына районда терлекләрнең баш саны артты. “Кама” агрофирмасы мөгезле эре терлекләрнең баш санын – 1559, ә “ВЗП “Рыбная Слобода” хуҗалыгы 591 гә арттырдылар.

Бер үк вакытта, “Слободское” һәм “Урахча” хуҗалыклары 466 һәм 395 башка киметтеләр.

* * *

Район буенча дуңгызларның баш саны 3337 гә артты. Арту нигездә “Саба” (3550 баш), “Ильман” (242), “Фаворит” (150) агрофирмалары, “Саргис” крестьян-фермерлык хуҗалыгы хисабына туры килә.

* * *

Ел башыннан 499 тонна ит җитештерелде. Узган елның шушы чоры белән чагыштырганда, ул 60 тоннага артык.

* * *

“ВЗП “Р.Слобода”, “Кама” агрофирмасы хуҗалыклары ит җитештерүне 3 тапкырга арттырдылар. Шул ук вакытта “Урахча” һәм “Кульга” 47-56 процентка киметтеләр.

* * *

Сөт җитештерү 109 процент тәшкил итте. Беренче кварталда “Кама” агрофирмасы күрсәткечләрен узган елның шушы чоры белән чагыштырганда 3 тапкырга яхшыртты. Кызганычка каршы, “Ривал-Агро”, “Урахча”, “Ландыш”, “Логос” сөт җитештерүне бөтенләй туктаттылар.

* * *

Быел 37 мең гектарда язгы культуралар, 5600 гектарда рапс чәчү планлаштырыла. Шулай ук кукурузның мәйданын 2000 гектарга арттыру бурычы тора.

* * *

Язгы кыр эшләре өчен 3300 тонна ашлама кайтарылды. Бу ихтыяҗның 50 процентын тәшкил итә.”Зюзино”да исә 1 гектарга 2,5 килограмм исәбеннән ашлама тупланган. “Азамат-Агро”, “Котлы Бөкәш” әлегә бер генә килограмм ашлама да кайгыртмаганнар.

* * *

2010 ел уңышына 62 мең центнер орлык салынган. Аның 91 проценты–конденцияле. “Масловский”, “Зюзино”, “Кулон” аеруча яхшы нәтиҗәләре белән куандыралар. “Анатыш”, “Ривал-Агро”, “Арыш” та конденцияле орлык бөтенләй юк.

* * *

Бүгенгә тракторларныңәзерлеге 67 процент тәшкил итә. Язгы кыр эшләрен кыска вакытта сыйфатлы башкару максатында “Кама” агрофирмасы МТЗ-1221 тракторы кайтартты, якын көннәрдә тагын шундый 3 трактор сатып алачаклар.

“Солтан” хуҗалыгы да “Барго-5250” чәчү комплексы алды. Шулай ук “Джон-Дир” тракторына заказ биргәннәр.

туган җирдә очрашу

Рәсәй һәм Татарстанның атказанган мәдәният хезмәткәре, тиздән 75 яшьлек юбилеен билгеләп үтүче якташыбыз, язучы Вакыйф Нуруллин белән очрашуга Олы Солтан урта мәктәбенә районның татар теле һәм әдәбияты укытучылары җыелган иде.

И.Аметов

Иң элек кайткан кунаклар катнашында язучының иң беренче повесте “Шинельсез солдатлар” исеме белән ачык дәрес үткәрелде. Аны укытучы Фирдия Хәйруллина зур осталык белән алып барды. Авыр сугыш еллары белән таныштырганнан соң ул шул чорларның тере шаһиты булган 60 ел укытучы булып эшләгән Александр Мамаковка сүз бирде. Үз чыгышында мөгаллим дәрестә сөйләгәннәрне тулыландырып, җанландырып җибәргәндәй итте. Дәрестән соң кунаклар бай тарихы булган мәктәп музее белән таныштылар.

Аксакал язучыбыз да очрашуга үзвакытында кайтып җитте. Мәктәп директоры Наилә Шәйхетдинова кичәне ачып:

–Мәктәбебездән әдәбият, сәнгать кешеләре күп чыкты. Араларында иң тыйнак, гади, халыкчан, зирәк акыл иясе Вакыйф ага Нуруллины без барыбыз да яратабыз, үз итәбез. Аның китаплары районыбыз кешеләренә багышланган. Шуларныңҗанлы образлары аша ул бөтен татар халкының кичерешен, яшәешен сурәтләгән, – дип очрашуга кайткан аксакал язучыбызга изге теләкләрен җиткерде.

Районыбыз мәктәпләреннән җыелган татар теле укытучылары өчен бу аралашу, очрашуныңәһәмияте гаять зур иде. Әнә Олы Әшнәк мәктәбе укытучысы Венера Гарипова бирегә сөенеп килүен җиткерде.

–Вакыйф абый Нуруллинныңәсәрләрендә безнең авылыбыз тарихы ярылып ята. Аның берәр повестен кулга алып укысаң туган як болыннары, язучы туып үскән Югары Әшнәк авылы күз алдыма килеп баса,–дип ул язучыга авылдашларыннан сәлам тапшырды, олы иҗат уңышлары теләде.

Олы Солтан авылы китапханәчесе Кәүсәрия Хәйруллинаның чыгышы да шактый кызыклы мәгълүматларга бай иде.

–Китапханә ул татар халкының илһамын, моңын, данын саклаучы йорт, дияргә ярата безнеңҗитәкчебез Рәүфә Кадыйрова, – дип ул районыбыз китапханә киштәләрендә Вакыйф ага Нуруллинның китапларына сорау зур булуын әйтте. Китап укучылар исеменнән аңа иҗат уңышлары теләде.

Күренекле язучыбызның олы юбилее туган мәктәбендә старт алуының да сере, мәгънәсе бар икән. Чөнки үз чыгышында әдип гомере буена йөрәк түрендә нибары ике кешегә карата бигрәк тә олы хөрмәт, ярату хисләрен саклавын әйтте. Аның беренчесе газиз әнисе булса, икенчесе беренче укытучысы икән. Чыннан да бала мәктәптә күп нәрсәгәөйрәнә. Булачак һөнәренә дә нәкъ мәктәп елларында ныклы нигез салына. Ул да очрашуда Солтан мәктәбендә укыган сыйныфташлары арасыннан 5 укучының язучы, шагыйрь булып китүен әйтте. Кыскача гына үз тормыш юлы белән таныштыргач укытучыларны кызыксындырган сорауларга конкрет җаваплар бирде.

–Әлеге җанлы очрашу өчен без сезгә бик рәхмәтлебез,–дип район мәгариф бүлеге методисты Илвира Касыймова язучыга сәламәтлек, иҗади уңышлар теләде.

–Вакыйф аганың иң кадерле мизгелләре безнең авылыбызда үткән. Әле дәҗәй айларында кунакка кайтып авыл халкы белән еш аралашып тора ул,–диде Олы Солтан авыл җирлеге башлыгы Рафис Сөнгатуллин. Киләчәктә дә авылга ешрак кайтуын сорап матур теләкләрен җиткерде.

Район мәгариф бүлеге башлыгы Илсур Садыйков исә татар теле укытучыларының язучы белән очрашуын бик күпләр өчен истәлекле көн буларак хәтерләрендә калачагын әйтте.

– Әдәбият күгендә якты йолдыз булып балкыган язучыбызны халкыбыз бервакытта да онытмас,–диде. Язучының туган мәктәбендә очрашуы күңелле, мәгънәле узды.

Укучыбыз хатирәләре

Авыл тарихы музеена Казан шәһәреннән истәлек хаты килде. Анда 1938 елда Котлы Бөкәш мәктәбен тәмамлап, хезмәт юлын укытучы буларак башлаган укучыбыз турында сүз бара.

К.Ахунов

Фасыйл Абдуллинны урта мәктәпне тәмамлагач Күки авылына эшкә билгеләгәннәр. Шул елда ул Мамадыш педагогия училищесына укырга керә. Ә инде 1939 елда армия сафларына алына. 1941 елның июнь аенда Чернигов шәһәре янындагы көнбатыш фронт составына кергән укчы полкта взвод командиры урынбасары булып хезмәт итә. Аннары ашыгыч рәвештә аларның 474 нче полкын Белоруссиягә күчерәләр. “Менә шунда гына без сугышның нәрсә икәнен аңладык”,–дип искә алган Фасыйл абый. Аларның взводына күперне саклау бурычы куела. Еракта снарядлар шартлау тавышы ишетелеп тора. Барысы да сугыша, ә безгә туры килми бит дип уйлап куя идем,–ди ул. 1941 елның 25 июлендә Жлобин шәһәре янында барган каты сугышларда катнаша ул. Шушы һөҗүм вакытында сугышчыларга үрнәк булырга тиешле взвод командиры лейтенант погоннарын йолкып атып, гади солдат гимнастеркасын кия һәм Фасыйл абыйга сугышчыларны атакага күтәрергә боера. Фашистлар һөҗүме кире кагыла. Аягы яраланган Фасыйл абыйны күп кенә сугышчылар белән бергә санитарлар төнлә белән Днепрның сул ягына чыгаралар. Һәм ул 1941 елның 10 декабренә кадәр Казахстанда госпитальдә дәвалана. Кабат сугышчан юлын артиллерия батальонында дәвам иттерә. 1943 елның июнь аенда аларны Курск дугасына күчерәләр.«Сугышның бер көнендә взводыбыздан 3 кеше генә исән калды»,–дип искә ала Фасыйл абый.

1943 елның сентябрь айларында Белоруссиядә барган сугышларда дошманның ут нокталарын юк иткәне өчен фронтовик укучыбыз «Батырлык өчен» медале белән бүләкләнә. Аннары Фасыйл абый Польшаны һәм Кенигсберг шәһәрләрен азат итүдә катнашып Кызыл Йолдыз ордены белән бүләкләнә.

1946 елның гыйнвар аенда туган ягына кайткач яраткан хезмәтен дәвам иттерә укытучы. Аннары мәктәп директоры, мәгариф бүлеге инспекторы вазыйфаларын башкара. Ул ярты юлда туктап калуны белми, һәрчак башлаган эшен ахыргача җиткерә. 1962-72 елларда Берсут пристанендә мәктәп төзүдә башлап йөри. Хөкүмәтебез тарафыннан куйган хезмәтләре өчен “Хезмәттәге батырлык өчен” медале белән бүләкләнә. Укучыбыз-фронтовик киләчәк буынга якты маяк булырлык саллы хезмәт юлы үткән. Бу истәлек хатын аның кызы Рәисә Казан шәһәреннән җибәргән. Кызганыч, укучыбыз ике ел элек вафат булган.

Беренче карлыгачлар

Без кабызган утлар сүнмәс алар,

Сүнмәс алар хәтәр җилләрдә...

Үсеп килүче яшь буынга тәрбия һәм белем бирүдә укытучының роле гаять зур.

Шул уңайдан мин дә Ямаш авылында күп еллар укытучы булып эшләгән Хәмзина Галимә Таҗетдин кызының педагогик эшчәнлеген күзәтеп чыгарга булдым.

Виль Шәрәфетдинов

Ул 1905 нче елда Татарстанның хәзерге Алексеевск районының Юеш Көрнәле авылында дөньяга килә. Балачакта әтисеннән укырга-язарга өйрәнеп, 12 яшеннән бирле Казандагы Ләбибә Хөсәинованың кызлар мәктәбендә укып тәрбияләнә.

1919 нчы елда Хәмзина Галимә Лаешта ачылган 6-айлык укытучылар хәзерләү курсларына укырга керә. Шунысы игътибарга лаеклы – укытучылар арасында Г.Исхакыйның энесе (соңыннан репрессияләнгән) Хәсән Исхакый да була. Курсларны тәмамлагач, үз авылларында һәм Кече Әшнәктә (хәзерге Балык Бистәсе районында) 1924нче елга кадәр укытучы булып эшли.

Бу еллар – Октябрь революциясеннән соң Гражданнар сугышы һәм Татар республикасының формалашкан еллары. Республика төзелгәч, халык мәгарифе дә зур үзгәрешләр кичерә. Бөтен илдә мәҗбүри 4-еллык белем бирүһәм наданлыкны бетерү (ликбез) законы кабул ителә. Республикада махсус урта белем бирү системасы формалаша башлый. Казан, Чистай, Алабуга, Спасск, Тәтештә педагогик техникумнар ачыла. 1924 нче елны Хәмзинә Галимә дә Чистай педтехникумының 1-нче курс студенткасы була. Ул уку елларын Хәмзинә Галимә зур тормыш, тирән белем алу еллары дип саный һәм анда күренекле тел галимнәре Мөхетдин Корбангалиев, Дәүләтша Сафиннар кебек мәшһүр шәхесләрдән белем ала. Инде, 1928 нче елны техникумны тәмамлагач, ул Балык Бистәсе районының Ямаш авылына эшкәҗибәрелә.

Ләкин бу авылда эшне башлау ансат кына булмый әле. Уку-укыту эшләре элекке мәхәллә мәдрәсәсе системасыннан яңача укуга күчү чорын кичерә. Укыту өчен шартлар бик түбән, мәктәпнеңүз бинасы да булмый. Аның ролен Сафин Хафиз дигән хуҗаның арендага биреп торган йорты үти. Шундый шартларда да Хәмзина Галимә югалып калмый, техникумда алган белемен эшкәҗигә. Рәсем, музыка, кул эшләре кебек һөнәрләре ярдәмгә килә. Үзе күргәзмәәсбаплары ясый, лозунглар яза, гармунда уйнап, балаларга җырлар өйрәтә.

Көндез балаларны, кичен өлкәннәрне укыта, наданлыкны бетерү программасы белән эшли. Мәктәптә “Кызыл почмак” оештырып, авыл яшьләре белән мәдәни һәм әдәби чаралар үткәрә тора. Үз тирәсенә алдынгы яшьләрне туплап, беренчеләрдән буларак “Кооператор хәйләсе“, “Җиһанша” кебек, шул чор проблемаларын чагылдырган спектакльләрне куя. Бу зур яңалык була авылда. Спектакльләрдә катнашучылар: Хәмзина Галимә, Сафин Нәҗип, Таһиров Кыям, Вәлиәхмәтов Фәйзрахман, Нуретдинов Хәйретдин, Нәҗмиев Нәҗип, Шәрәфетдинов Ширияздан, Галиуллин Галимулла һәм бүтәннәр булалар. Бу хакта күп еллар үткәч тә авылдашлары Мәрьям һәм Нурлыбанат апалар сагынып искә алалар иде әле.

Алга таба мәктәпнеңүз бинасын булдыру мәсьәләсе алда тора. Авылда ике мәчет. Берсе гел йозакта, халык анда йөрми иде. Аны мәктәп итеп файдалану турында Хәмзина Галимә авыл активистлары белән киңәшләшә. Чөнки мәктәп тә бит – тәрбия, белем бирү урыны. Авыл советы рәисе Сафин Мөхәммәтхан, Нуриәхмәтов Кәримулла, Сафин Нәҗип, Вәлиәхмәтов Фәйзерахман абыйлар эшне уңай хәл итүдә булышлык күрсәтәләр. Шуннан соң авыл балаларының нормаль укулары башланып китә. Авылда бу эш белән килешмәүчеләр дә килеп чыга тора. Көннәрдән бер көнне ризасызлык күрсәткән бер төркем хатын-кызлар мәктәпкә бәреп кереп, укытучыларны җәберләмәкче булалар. Бу төркем белән бәрелеш туа, көчләр тигез булмый, укытучыларга ничек-алай качып котылудан башка чара калмый. Менә шундый катлаулы, каршылыклы заманнарда эшләргә туры килә аларга, беренче карлыгачларга...

Алга китеп, шуны да әйтергә кирәк, бу мәчет бинасы 70нче елларга кадәр башлангыч мәктәп вазыйфасын үтәде. Шул елларда яңа урта белем бирү мәктәбе салына, хәзер инде балалар уку өчен барлык уңайлыклары булган биналарда белем алалар. Укытучылары да югары белемле, алдынгы уку-укыту методикаларын кулланып эшләүче бердәм коллектив булып яшиләр.

Инде үзгәртеп кору еллары килеп җиткәч, авылга мәчет кирәклеге ачыкланды. Аныңөчен урын, төзү материалларын эзли башладылар. Шул вакытта пенсиядәге өлкән укытучы Хәмзина Галимә “Мәчет урынын безнең бабайлар үткән гасырларда тапканнар бит инде”, дип әйтте, шуннан аны яңартып матур яшел пластик материал белән каплап куйдылар. Бүген ул “Мәчет тавы” башында яшел маяк кебек ераклардан күренәһәм дә көмеш гөмбәзле манарадан таралган моңлы азан тавышлары авыл өстенә иман нурларын сибеп тора...

1929 нчы елны Хәмзина Галимә Урал заводларында эшләүче Ямаш егете Шәрәфетдинов Ширияздан белән гаилә тормышын башларга ризалык бирә. Алар өйләнешәләр. Ширияздан вакытлы гына ялда булу сәбәпле, кире Чусовая шәһәренә китеп бара. Галимә авылда эшләргә кала, ә 1930нчы елны ире Ширияздан янына бергә яшәргә китә.

Балалары тугач, яшәү шартлары бик авыр булу нәтиҗәсендә, әнисе Мәфтуха янына кайтырга мәҗбур була. Алексеевск районының мәгариф бүлеге аны Кыр Шенталасы авылына мәктәп мөдире итеп эшкәҗибәрә. Анда ул 1933 елга кадәр мәктәпне җитәкли һәм балаларга белем бирүне дәвам итә. Ә ире Ширияздан Троицк шәһәрендә партия мәктәбен укып бетергәч, туган якларына кайта, гаиләсе белән даими яши башлый. Балык Бистәсе район мәгариф бүлеге аларның икесен дә Күки авылына мәктәп мөдире һәм укытучылар итеп билгели.

Ул елларда халыкта массакүләм аңлату эшләрен алып бару, төрле мәдәни чаралар үткәрү мәшәкатьләре тулысы белән авыл укытучылары өстенә төшә. Мәктәп эшләреннән бушагач, авыл халкы өчен концерт, спектакль программалары төзеп, аларны күрсәтүдә беренчеләрдән булалар. Драматург Кәрим Тинчуринның “Зәңгәр шәл” драмасын кую да, шуның бер мисалы.

1939 нчы елны Хәмзина Галимә ире Ширияздан белән Түбән Сон авылында мәктәптә эшләп, Ямашка 1940 нчы елны әйләнеп кайталар, яшь буынга белем бирү эшен дәвам итәләр.

1941 нче елда, Бөек Ватан сугышы башлангач, Шәрәфетдинов Ширияздан сугышка китә. Инде мәктәп мөдире вазыйфалары Хәмзина Галимәгә йөкләнә. Авыр сугыш елларында да белем бирү эше туктамый. Ул елларның халык өстенәһәм дә уку-укытуга нинди кыенлыклар китергәнен бөтен ил белә. Хәмзина Галимә бу елларда да үзен оста оештыручы, бар кыенлыкларны җиңеп балаларга белем бирүче мөгаллимә икәнен янә бер кат исбатлады.

Ниһаять коточкыч сугыш еллары үтеп-китеп, ире Ширияздан җиңүчеләр сафында исән-сау кайтып төшә. Икесе дә Ямаш авылы мәктәбендә яраткан эшләрен дәвам итәләр.

Хәмзина Галимә 1947нче елга кадәр эшләп лаеклы ялга чыга. Шәрәфетдинов Ширияздан 1962 нче елда пенсиягә китә. Гомернең соңгы елларын алар Ямашта һәм Яшел Үзән шәһәрендә балалары белән үткәрәләр.

Әгәр дә артларына әйләнеп карасалар, алар анда зур тормыш юлын, күп санлы яшь буынның белем диңгезенә, дөньяга күзен ачканын һәм дәүзләренең 6 баланы тудырып, үстереп шул олы юлга кертеп җибәргәннәрен күрерләр иде. Үз балалары һәм биш оныклары да авыр һәм мактаулы хезмәт юлын – укытучы юлын сайладылар.

Автордан: Язмада әти һәм әнинең шәхси архив материаллары кулланылды.

Бәйгедә ныгый билләр

Күптән түгел Олы Елга мәктәбе спорт залында 1995 елгы һәм яшьрәк укучылар арасында спорт мастеры Марсель Дияров призларына татарча көрәш ярышлары булып узды. Бу бәйге Бөек Җиңүнең 65 еллыгына да багышланды.

И.Җамалиев

Ярышларда район мәктәпләреннән килгән 15 команда катнашты. 80 яшь көрәшче 10 үлчәү авырлыгында көч сынаштылар.

Трой-Урайдан Илсаф Миннебаев (29 килограммга кадәр), Олы Елгадан Илназ Галиуллин (32 кг.), Ямаштан Инсаф Баһавиев (36 кг.), Яңа Арыштан Риназ Гобәев (40 кг), Зур Мәшләктән Рәмис Сафин (45 кг.), Балык бистәсе гимназиясеннән Эльмир Кәлиев (50 кг.), Яңа Арыштан Илшат Мусин (55 кг.), Илсаф Әхмәтҗанов (60 кг.), Балык бистәсе гимназиясеннән Булат Нәбиуллин (65 кг.), Күгәрченнән Инсаф Баһманов (65 кг. нан югары) үз үлчәү авырлыкларында батыр калдылар.

Командалар арасында Яңа Арыш көрәшчеләре беренчелекне яуладылар. Айрат Садыйков шәкертләре 6 призлы урын алуга ирештеләр. Гомумән, яңаарышлылар һәр ярышта башкалардан бер башка өстен булуларын күрсәтәләр. Келәм хуҗалары–Олы Елга командасы (тренер М.Дияров) икенче урынны алдылар. Өченче урында–Балык бистәсе гимназиясе көрәшчеләре (тренер Рафыйк Мөхәммәтшин). Гамил Шәмсевәлиев әзерләгән Күгәрчен командасы да матур көрәш күрсәтте. Шул ук вакытта Масловка, Иске Арыш, Балыклы Чүкәй мәктәпләреннән бу ярышка килмәүләре һич аңлашылмый. Әлеге мәктәпләрдә көрәш түгәрәкләре эшләп килә, югыйсә. Әллә алар кәгазьдә генәме, дигән урынлы сорау туа.

ОАО “Кама” агрофирмасы директоры Камил Садыйков, Олы Елга мәктәбе коллективы ярышларны уздыруга зур өлеш керттеләр. “Бердәм Россия” сәяси партиясенең җирле бүлеге җитәкчесе М.Гаянов та иң яшь, өметле көрәшчеләргә махсус призлар әзерләгән иде.

Заманында матур көрәше белән күпләрне сокландырган спорт остасы М.Дияров үз призларына ярышны икенче мәртәбәүткәрә инде. 15 елга якын тренер булып эшләү дәверендә дә күп кенә шәкертләр тәрбияләде ул. Аның районда татарча көрәшне үстерүгә керткән өлеше һәрьяклы хуплауга лаек.

БАРЛЫК ЯҢАЛЫКЛАРНЫ УКУ

МӨҺИМ МӘСЬӘЛӘЛӘР КАРАЛДЫ