Район газ службасы хезмәткәрләре үзләренең һөнәри бәйрәмнәрен билгеләп үттеләр

Әле шушы көннәрдә генә “Газпром Трансгаз Казан” җәмгыяте оешыуна 60 ел тулды. Бу көннәрдә район газ службасы хезмәткәрләре үзләренең һөнәри бәйрәмнәрен билгеләп үтәләр. Шул уңайдан әлеге коллектив җитәкчесе Бәйрамхан Фатыйховтан без үзләренең көндәлек эшләре һәм киләчәккә планнары турында сөйләүен сорадык.

 

–Коллективыбыз бүген район оешма предприятияләре һәм халкыбыз өчен гаять зур эш башкара. Табигать шартларының нинди генә булуына карамастан районыбызда газ ягулыгы белән тоткарлыклар булмавы хезмәткәрләребезнең киеренке хезмәт нәтиҗәсе. Ни дисәң дә, бүген районыбыз биләмәсендә 820 километрдан артык газ челтәренә 29, газ басымын көйләүче пунктка  һәм 100 гә якын газ шкафларына үз вакытында техник хезмәт күрсәтелеп тора. Безнең коллективта бүгенгесе көндә 109 кеше эшли. Аларның барсы да үз хезмәтләренең чын осталары. Район җирлегендә 68 авылның газлаштырылуы да эш күләменең ни дәрәҗәдә зур булуын дәлилли. Һәр авылда безнең газ буенча җаваплы хезмәткәрләребез эшли. Алар авыл халкына куркынычсызлык кагыйдәләрен кисәтүдә күп эш башкаралар. Шулай ук һәр елда диярлек халкыбызның йорт җирләрен төзекләндереп, газ челтәрләрен үзгәртүдә котельныйларны, газ исәпләгечләрен яңартуда да зур ярдәм күрсәтәләр. Районыбызда һәм авыл җирлекләрендә куркынычсызлык кагыйдәләрен төгәл үтәп, халыкны өзлексез газ ягулыгы белән тәэмин итү коллективыбыз алдына куелган төп бурычларның берсе булып тора. Соңгы елларда безнең коллектив газ службасы идарәсе буенча әйдәүчеләр рәтендә.

 

Районыбызда елына уртача халыкның көн-күреше өчен 27 миллион кубометр газ бирелә. Хезмәткәрләребез тәүлек буена үз эшләрен намуслы башкаралар. Районыбызның авария диспечарлык службасын Марат Абдуллин җитәкли. Алар тәүлек буена барлык агрегатларның һәм газ челтәрләренең өзлексез эшләвен тәэмин итәләр. Биредә Ринат Ахунов, Сергей Керженцев, Илфат Мукриев кебек хезмәткәрләрне үз эшләренең чын остасы дип атарга мөмкин. Шулай ук коллективыбыз уңганы газ һәм электр белән эретеп ябыштыручы Василий Яковлев исеме дә район халкына яхшы билгеле. 

 

Тулысынча газетадан укый аласыз.

 

Идрис Аметов.

 

 

Автор фотолары.