Балык Бистәсе икенче номерлы мәктәбе укучыларын кабат үзенә җыйды

Укучы формасыннан киенгән, кулларына чәчәк букетлары тоткан балалар мәктәпкә ашыга. Әти-әнигә дә зур бәйрәм бүген, балаларын озатырга дип алар да килгәннәр. Укытучылары укучыларын сагынганнар, һәркайсын кочаклап каршы алдылар. Әле генә 11сыйныф укучыларын олы тормышка очырган мәктәп бүген беренче сыйныфка кырык җиде бала кабул итә.

 

Аларны А һәм Б классларына бүлгәннәр. Быел мәктәптә барлыгы 442 укучы тәрбия һәм белем алачак. 

 

Кыңгырау чылтырауга барысы да мәктәп каршына бәйрәм тантанасына җыелдылар. Мәктәп директоры Илдус Фатыйхов барысын да бәйрәм белән котлады. “Бүген якты һәм истә калырлык бәйрәм. Укучыларга бишкә генә укырга, әти-әниләргә сабырлык, укытучыларның җиң сызганып эшләүләрен телим”,–диде ул. Бәйрәм белән котларга дип социаль яклау бүлеге җитәкчесе Айгөл Вафина, район үзәк хастаханәсенең баш табибы Мансур Китаев килгәннәр иде.

 

Балалар белән ата-аналар да бүген дулкынлану хисләре кичерәләр. “Олы улыбыз Рияз тугызынчы, кечесе–Риназ икенче сыйныфка бара. Кечкенәсе бигрәк тә мәктәпне сагынып килде. Беренче сыйныфны уңышлы гына тәмамлаган иде, быел да тырышыр дип уйлыйм”,–диде Риада Шакирова. Икенче А сыйныф җитәкчесе Любовь Смолина да укучыларын бик сагынган.

 

“Укучыларымны сау-сәламәт күрүемә мин бик шатмын. Балаларга быел аеруча тырышырга туры килер. Чөнки яңа фәннәр өстәлде, чирек билгеләре чыгачак. Уңышлар, гел яхшы билгеләргә генә укуларын телим”,–диде ул. Унынчы сыйныф җитәкчесе Альвина Шиһапова да үз укучылары белән бик горурланып сөйли. “Минем укучыларым иң көчле сыйныф санала. Яхшы билгеләргә генә укыйлар. Быел да сынатмаслар дип уйлыйм”,–диде ул чын күңелдән сөенеп. “Мин дусларымны, укытучыларымны бәйрәм белән котлыйм. Каникулны яхшы гына уздырдык, хәзер бөтен көчне укуга куячакмын. Биология, химия дәресләрен яратам мин”,–дип сүзгә кушылды унынчы сыйныф укучысы Рафаэль Минвалиев.

        

Гөлназ Зарипова.

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

Автор фотолары.