«Бистә җирлеге кыйбласына тугрылык кылып яши»

Хезмәт кешесе үзенең уңыш- казанышларын барлап алса, көрәшче халкы мәйданда үзен күрсәтергә әзерләнә, олысы-кечесе, кайткан кунагы бәйгеләрдә катнашып Сабантуе бүләгенә ия булырга тырыша. Соңгы елларда Балык Бистәсе районы Сабантуйлары югары дәрәҗәдә узуы белән аерылып тора, тамашачының күңеленә хуш килә. Быел да, шәт, сынатмабыз, бәйрәмгә әзерлек шактый алдан башланды. Елыбыз Татарстан лидеры Рөстәм Миңнеханов башлангычында–парклар һәм скверлар елы буларак игьлан ителгәнчә үзәк Сабантуй урынында яңа скверга нигез салына башлады. Районыбызның йөзе зур үзгәрешләр кичерә. Үзәктә, авылларда дистәләгән социаль обьектлар калка. Сабантуй көннәрендә генә дә шактый авылларда “Халык өчен!” шигарында төзелгән заманча  биналар файдалануга тапшырылачак. Хәер, болар хакында район башлыгы Илһам Валеевның үзеннән ишетсәк урынлырак булыр.

 

    –Илһам Госманович, Сабантуе, беренче чиратта язгы кыр эшләреннән соң барлык халык белән бәйрәм ителә торган хезмәт туе буларак кабул ителә. Бу уңайдан, сез бәйрәмгә канәгатьлектә киләсезме?

 

–Әлбәттә, кәефләр яхшы. Язгы кыр эшләрен бик оешкан төстә һәм куйган максатларга ирешеп тәмамладык. 50 мең гектарда язгы культуралар чәчтек. Соңгы елларда районда техник культуралар игүгә игьтибар артты. Икьтисади тотрыклыкта яшәргә телисең икән, заманадан калышмыйсың инде. “Масловский”, “Кулон-Агро”, “Логос”, “Зюзино” җәмгыятьләре җитәкчеләре, Нияз Шәмсетдинов, Камил Гөбәйдуллин, Данил Габдриев, Рафыйк Абдуллин кебек фермерларыбыз нәкь менә шундыйлар, көн таләбен тоеп яшиләр. Гел дә шуны искәртеп киләм, хезмәт кешесенең намусына, осталыгына, тырышлыгына күп нәрсә бәйләнгән. Ә андыйлар безнең җирлектә аз түгел. Әйтиек, “Кулон-Агро” җәмгыятенең алдынгы механизаторы Ринат Шәрәфиев быелгы язгы кыр эшләре барышында 73 норма-смена эш башкарды. “Логос”тан Фәрит Гәрфетдинов, “Зюзино”дан Камил Мөхәммәтҗанов, “Азык-төлек корпорациясе”ннән Юныс Мөхәммәтҗанов, “Масловский”дан Марат Валиевның хезмәт уңышларын күпләргә үрнәк итеп куярлык. Нияз Шәмсетдинов хуҗалыгыннан Җүәрия Загриева кышлату чорында бер сыерга уртача 5650 килограмм сөт савып алды. Быелгы район Сабантуе флагын күтәрү хокукы аңа бирелде. Бу көнне барысы 40 тан артык хезмәт алдынгыбызны мәйдан түренә чакырып хөрмәтләячәкбез.

 

 –Кунакка кайтучы якташларыбыз, башка аралашучылар да еш кына юлларыбыз хакында җылы сүзләр әйтәләр. Бу уңайдан быел кайсы җирлекләрне сөендерү район планына кергән?

 

–Шунысын билгеләп үтәргә кирәк, асфальт белән тоташмаган берничә кечкенә авыл гына калып бара. Нигездә, тулы канлы тормыш белән яшәүче, мәктәпле авылларның үзәгенә асфальт юл сузылган. Бүгенге көндә олы җирлекләрдә эчке урам юлларын яхшырту өстендә эшлибез. Узган ел Республика һәм Федераль Программалар нигезендә генә районда 350 миллион сумлык юллар төзелде һәм каты катлам белән түшәлде. Район үзәгендә генә биш урам асфальтланды, җиде урамга каты таш җәелде, биш авыл эчендә юллар төзекләндерелде. Быелгы планнарга килгәндә, Балык Бистәсе поселогы, Югары Тегермәнлек, Котлы Бөкәш, Яңа Арыш, Югары Мәшләк, Олы Елга, Бәтке, Кече Әшнәк авыллары халкын сөендерербез диеп уйлыйм. Авылларга яхшы юллар керү сәбәпле шәһәрдән кайтып йортлар салучылар да ишәя бара.

 

–Моңа авылның инфраструктурасы үзгәрү дә сәбәпчедер инде?

 

–Сүз дә юк. Суы, газы кергән, электр уты тоташкан, юлы бар. Узган ел гына 13 мең квадрат метрдан артык торак файдлануга тапшырылды. Дөрес, монда максатчан программаларның эшләве дә нык ярдәмгә килә.Соңгы өч елда 103 гаилә торак төзү өчен субсидия алдылар. Район үзәгенең “Поле чудес” почмагы кыска гына вакыт эчендә зәвыклы, заманча йортлар белән тулыланды. Инде подстанция янәшәсендәге бүленгән участокта да урамы-урамы белән йортлар барлыкка килә башлады. Авылларыбызда мәктәпләребез, мәдәният учакларыбыз, фельдшер-акушерлык пунктларыбыз танымаслык булып яңара. 

 

Бу язманы тулысынча газетадан укый аласыз.

 

Әңгәмәне Вазыйх Фатыйхов язып алды.

 

Фото редакция архивыннан.