Жан әрнүе безнең күңелләргә күчкән мәл

Әле дә сугыш яралары төзәлеп җитмәгән иде. Украина вакыйгалары илебез халкын тагын зур борчуга салды. Телевизор каналларыннан карап, радио тапшыруларын тыңлап йөрәкләр сыкрый. Сугыш уты безгә таба үрмәләмәсен иде. “Шундый мул, иркен тормышта яшибез. Нигә кирәк икән мондый кан коюлар, кеше күз яшьләре”,- диләр өлкәннәр. Украина халкы бу вакыйгалардан куркып, качып сыеныр урын эзләп, башка илдәге туганнарына, танышларына китә. Нәсел җепләре, туганлыклары белән безнең районга барып тоташкан унбер кеше Балык Бистәсенә кайтты.