Игорь Комаров ТР парламенты депутатларын һәм ветераннарын Дәүләт Советының 30 еллыгы белән котлады
2025 елның 28 мартында Татарстан Республикасында Татарстан Республикасы Дәүләт Советының сигезенче утырышы булды. Утырышны ТР Дәүләт Советы Рәисе Фәрит Мөхәммәтшин уздырды.
Утырыш эшендә Татарстан Башлыгы (рәисе) Рөстәм Миңнеханов, Татарстан Республикасы буенча Баш федераль инспектор Виктор Демидов, республика Премьер-министры Алексей Песошин, РФ сенаторлары һәм Дәүләт Думасы депутатлары, Хөкүмәт әгъзалары, профильле министрлыклар һәм ведомстволар, муниципаль берәмлекләр җитәкчеләре, дәүләт хезмәте ветераннары катнашты.
Утырышның көн тәртибенә, парламент Президиумы карары нигезендә, 20 мәсьәлә кертелде, шул исәптән 9 республика законы проекты һәм 3 федераль закон проекты.
Көн тәртибендәге беренче мәсьәлә Татарстан Республикасы Иҗтимагый-сәяси тормышындагы мөһим вакыйга-Дәүләт Советының 30 еллыгына багышланган иде.
Депутатларны һәм парламент ветераннарын ТР Дәүләт Советы Рәисе Фәрит Мөхәммәтшин котлады. Ул РФ Президентының Идел буе федераль округындагы тулы вәкаләтле вәкиле Игорь Комаровның сәламләвен укыды.
"Тарих өчен 30 ел – бик аз. Ә Татарстанда бу елларда Дәүләт Советы Россия Федерациясенең иң уңышлы төбәкләренең берсен үстерүнең ныклы хокукый нигезен булдырды. Бергә системалы эшләүче закон чыгару һәм башкарма хакимиятнең кыюлыгы һәм ихтыяр көче бөтен зур илебез өчен хас булган күп кенә проблемаларны хәл итү өчен кирәкле этәргеч булды, республиканы Россиянең иң алга киткән һәм матур төбәкләренең берсе итте – без гражданнарның социаль-икътисадый һәм иҗтимагый-сәяси тормышының иң актуаль мәсьәләләренә юнәлтелгән бу тырыш эшнең нәтиҗәләрен үз күзләребез белән күрәбез. Татарстанның бөтенроссия һәм халыкара дәрәҗәдәге статуслы чаралар үткәрү үзәгенә, теләсә нинди шартларда җиңү яуларга, алга барырга, яшәү өчен яхшырак шартлар тудырырга сәләтле күпмилләтле, күп конфессияле, динамик рәвештә үсеп килүче илебезнең «визит карточкасына» әйләнүе очраклы түгел.
Татарстан Республикасы Дәүләт Советының барлык чакырылыш закон чыгаручыларына туган Татарстанның чәчәк атуы һәм шушы матур җирдә яшәүче һәм эшләүчеләрнең иминлеге хакына киләчәктә дә уңышлар телим!",- диелә сәламләүдә.
Шулай ук депутатларны һәм парламент ветераннарын Татарстан Башлыгы (рәисе) Рөстәм Миңнеханов котлады.
Рөстәм Миңнеханов сүзләренчә, өч дистә ел эчендә парламентаризмның ышанычлы хокукый нигезе булдырылды, югары профессионализм, җаваплылык һәм бердәмлек традицияләренә нигез салынды. «Бу принциплар, буыннар дәвамчанлыгын саклап, барлык чакырылыш депутатлар эшчәнлегенең аерылгысыз өлешенә әверелде», – дип ассызыклады ТР Рәисе.
Сигезенче утырышның көн тәртибен раслау барышында профильле комитетлар рәисләре көн тәртибенә өстәмә мәсьәләләр кертү тәкъдиме белән чыктылар. Фикер алышу нәтиҗәсендә Дәүләт Советының сигезенче утырышының көн тәртибе 23 мәсьәләгә кадәр киңәйтелде.
Утырыш барышында депутатлар кайбер суд участокларына Татарстан Республикасы җәмәгать судьяларын сайлау мәсьәләсен карадылар. Законлылык һәм хокук тәртибе комитеты тәкъдиме буенча (аның карары белән аны җитәкчесе Александр Чубаров таныштырды) парламентарийлар өч елга Татарстан Республикасы җәмәгать судьялары итеп Ландыш Тимофееваны (Зәй суд районы буенча 1 нче суд участогына) һәм Татьяна Ярцеваны (Зәй суд районы буенча 2 нче суд участогына) сайладылар.
Бүген Дәүләт Советы утырышында беренче тапкыр Конституция Советының 2023 – 2024 елларда Татарстанда конституциячел законлылыкның торышы турындагы доклады тәкъдим ителде.