Ульяновскида Игорь Комаров ИФО закон чыгаручылар ассоциациясе утырышында катнашты
Ассоциация утырышы кысаларында Татарстан Республикасы Дәүләт Советы һәм Марий Эл Республикасы Дәүләт Җыелышы арасында хезмәттәшлек турында килешү имзаланды
2020 елның 27 августында Ульяновск шәһәрендә Идел буе федераль округы РФ субъектлары дәүләт хакимиятенең закон чыгару органнары ассоциациясенең 59 нчы утырышы узды. Ассоциация эшендә РФ Президентының Идел буе федераль округындагы Тулы вәкаләтле вәкиле Игорь Комаров, Ульяновск өлкәсе губернаторы Сергей Морозов, округ төбәкләренең закон чыгару органнары җитәкчеләре катнашты.
Татарстан Республикасыннан чарада ТР Дәүләт Советы Рәисе Фәрит Мөхәммәтшин катнашты.
Утырышны ачып, Игорь Комаров РФ Конституциясенә төзәтмәләр буенча гомумроссия тавыш бирүенә нәтиҗә ясады һәм башкарылган эшләре өчен рәхмәт белдерде.
Тулы вәкаләтле вәкил ассызыклаганча, Президент Владимир Путин инициативасы белән кертелгән үзгәрешләр төбәкләрнең барлык закон чыгару органнары тарафыннан оператив рәвештә каралды һәм хупланды: «барлык дәрәҗәдәге депутатлар тарафыннан Федерациянең һәр субъектында яшәүчеләргә Конституциягә үзгәрешләр кертү турында мәгълүмат җиткерүгә зур өлеш кертелде. Округ сайлаучыларының 70% тан артыгы тавыш бирүдә катнашты, аларның 80% ы тәкъдим ителгән төзәтмәләрне хуплады».
Игорь Комаров шулай ук яңа конституция нигезләмәләре, беренче чиратта, балаларны, гаилә кыйммәтләрен, хезмәт һәм социаль гарантияләрне, һәркемгә дә уңайлы һәм сыйфатлы медицина, тотрыклы хакимиятне яклауга юнәлдерелгән, дип искәртте.
Шул ук вакытта, вәкаләтле вәкил сүзләренә караганда, якын арада федераль һәм төбәк законнарындагы киң үзгәрешләр кирәк булачак, кабул ителә торган барлык карарлар оператив рәвештә кешеләргә җиткерелергә тиеш: «гражданнарның хокукый грамоталылыгын Формалаштыру, һичшиксез, хакимият органнары эшчәнлегенең өстенлекләреннән берсе булырга тиеш. Төбәкләрдә яшәүчеләргә түләүсез юридик ярдәмнең төп төрләре һәм аны алу тәртибе турында мәгълүмат бирүгә аерым игътибар бирергә кирәк".
Һәм бүген барлык дәрәҗәләрдә дә иң актуаль мәсьәләләрнең берсе-илнең, регионнарның һәм муниципалитетларның үсеш стратегияләрен дәүләт башлыгы билгеләгән милли максатларга һәм стратегик бурычларга туры китерү.
Татарстан Республикасы Дәүләт Советы Рәисе Фәрит Мөхәммәтшин үз чыгышында республикада закон рангында 2030 елга кадәр Татарстан Республикасын социаль-икътисадый үстерү стратегиясе раслануын искәртте. Аның принципиаль таләпләреннән берсе республиканың барлык 45 муниципаль районы һәм шәһәр округының үсеш планын конкретлаштыру булды. Һәр муниципалитетның стратегик документын эшләүдә Башкарма комитет, предприятие һәм учреждение җитәкчеләре, авыл җирлекләре башлыклары, экспертлар һәм актив җәмәгатьчелек катнашты.
Татарстан Дәүләт Советы Рәисе арадаш максатларга ирешүгә мониторинг үткәрүнең мөһимлеген билгеләп үтте.
Утырышта яңгыраган инициативалар Идел буе федераль округы төбәкләре хакимиятенең закон чыгару органнары белән килештерелгәннән соң Дәүләт Думасына һәм Россия Федерациясе Хөкүмәтенә җибәреләчәк.
Ассоциация утырышы кысаларында Татарстан Республикасы Дәүләт Советы һәм Марий Эл Республикасы Дәүләт Җыелышы арасында хезмәттәшлек турында килешү имзаланды. Документка төбәкләр дәүләт хакимиятенең ике закон чыгару органы җитәкчеләре Фәрит Мөхәммәтшин һәм Анатолий Смирнов кул куйды.
Чара Роспотребнадзорның барлык санитар-гигиена чараларын һәм рекомендацияләрен үтәү белән узды.