Без–иң көчлеләр!

Без–иң көчлеләр!

Сайлап алу турын уңышлы үтеп безнең команда Татарстанның иң көчле футбол командалары белән очрашты. Финалга шулай ук Кукмара, Байлар Сабасы, Тәтеш, Болгар һәм Спас районы футболчылары да чыктылар. Ярышларда катнашучыларны район башлыгы И.Валеев сәламләде. Ул футболчыларга гадел, матур уен, спорт бәхете һәм уңышлар теләде.

Безнең район командасы җомга көнне тәтешлеләрне җиңде, шимбә көне кукмаралылар белән тигез исәпкә уйнадылар, якшәмбе көнне Байлар Сабасы командасы белән очраштылар. Балык бистәсе командасы матчның беренче минутларыннан ук инициативаны үз кулына алды. Дөрес, көндәшләр дә еш һөҗүм иттеләр. Беренче тайм 1:1 исәбе белән тәмамланды. Икенче таймда да балыкбистәлеләр активлык күрсәттеләр һәм тиздән исәп якташларыбыз файдасына 2:1 булды. Аннан соң да безнең егетләр сабалылар капкасы янында еш кунак булдылар. Әмма исәп үзгәрмәде.

–Матч киеренке булды, көчлеләр җиңде инде,–диде ТР футбол федерациясе рәисе урынбасары Р.Әхмәдуллин. –Җылы һәм дусларча кабул иткәннәре өчен хуҗаларга рәхмәт. Ярышлар югары дәрәҗәдә узды.

–Дуслык һәм спорт җиңде,–дип өстәде район башкарма комитеты җитәкчесенең социаль мәсьәләләр буенча урынбасары Р.Хәбибуллин.

Тантаналы һәм шатлыклы мизгелләр. Ярышларның кубогы һәм алтын медальләр безнең футболчылар кулында. Тамашачылар аларны алкышларга күмделәр. Молодцы!

Рәсемдә: җиңүче команда.

В.РОДИОНОВ.

 

 

 

–Менә егерме икенче елыбызны Республика көнен билгеләп үтәбез һәм шул унайдан бу көнне сәяси, сәнәгати казанышларыбызны барлау матур традициягә әверелде. Күреп торабыз, Татарстан мөстәкыйльлек шартларында үсә, ныгый һәр тармакта алга китә , үз чиратында бу уңай үзгәрешләр безнең җирлектә дә якты чагылышларын таба. Авыл хуҗалыгы районы буларак, игенчелек һәм терлекчелек тармакларына тукталып үтәсем килә. Ел кырыслыгына карамастан булган уңышны вакытында, югалтуларсыз җыеп алдык. Югары технология, агроталәпләргә җитди игътибарлы караган “Зюзино”,” Масловский”, “Ильман”, “Логос” хуҗалыклары быел да мул уңышлары белән сөендерделәр. Әлеге хуҗалыкларда бөртеклеләрнең гектар уңышы уртача 23-19   ар центнер тәшкил итте. Комбайнчыларыбыз–Николай Афанасьев ‘Логос”, Әгъзәм Хисмәтов “Логос” (бу сезонда!) 20790 һәм17740 центнер ашлык суктырып алдылар. Шушы ук хуҗалыктан шофер Михаил Лаврентьев басулардан амбарга 2668 тонна икмәк ташыды. Бүгенге көнгә көзге чәчүне 5 мең гектар мәйданда үткәрдек.   “Аяз-Ойл”,”Масловский” хуҗалыклары аны аеруча сыйфатлы башкаруга ирештеләр.”Кама” хуҗалыгы механизаторы Ильнар Нәҗмиев 710 гектарда көзге культуралар чәчеп районыбыз механизаторлары арасында әйдаманлык итә. Ул бүгенге көндә туңга сөрүдә дә алдынгылар рәтендә. “Азык-төлек корпорациясе” җәмгыятеннән Үзбәк Мусин кебек фидакарьлек үрнәкләре күрсәтеп эшләүче өлкән буын механизаторларыбызга да олы рәхмәтлебез. Алар үзләренең хезмәтләре белән күпләргә үрнәк булып торалар.

Районда сәнәгать продукциясе җитештерү тотрыклы үсә, малларның баш саны арта. Әйтик, дуңгызларның саны бүгенге көнгә 12389 башка җитте. Бу уңайдан без һәрчак “Агрофирма Слобода”ны үрнәк итеп куябыз. Соңгы вакытта гаилә фермалары сәнәгати алгарышка саллы гына өлешләрен кертә башладылар. Әлеге юнәлешләрнең башында Данил Нәбиуллин, Илдус Шакиров, Раиф Хәмидуллин, Илгиз Маннанов, Фердинанд Ногманов, Данил Габдриев кебек булдыклы егетләребез тора.

Күгәрчен төбәгендә мрамор ит җитештерү заводы эшләп китсә терлекчелек өлкәсендәге уңышларыбыз тагын да ишәер дигән өмет бар. Аның беренче этап объектларын сафка бастыруны төгәлләделәр инде. Якын киләчәктә “Кулон”, “Губайдуллин. К.” кебек хуҗалыкларыбыз заманча комплекс- фермалар торгызырга җыеналар.

–Төзелеш дигәннән, Республика көне алдыннан районда шактый гына объектларны ачу тантаналары көтелә. Кайберләренә аерым тукталып китмәссезме?  

–Әйе, бу көннәрдә дистәләгән объектны ачу тантаналары булачак. Республика көненә заманча, зәвыкъ белән төзелгән “Чингисхан” сәүдә йорты ишекләрен ачачак. Аннан ипотека кысаларында төзелгән 12 квартиралы йортны файдалануга тапшырырга уйлыйбыз. Моңа кадәр авария хәлендәге йортта яшәгән дүрт гаиләгә яңа квартираларның ачкычларын бүләк итәчәкбез. Чулман ярында колачлы эшләр башкарылды. Төзүчеләр бу объектны тапшырырга планлаштыралар. Әлеге урын балыкбистәлеләрнең иң матур почмагына әйләнәчәгенә бер шигем юк. Солтан авылы халкын яңа мәдәният йорты белән куандырырга җыенабыз. Масловка мәктәбе укучылары быел өр- яңадан төзекләндерелгән мәктәп бинасына аяк басачаклар, “Строитель-5” төзүчеләре аларга бер дигән бүләк әзерләделәр.   

–Бәйрәм алдыннан гына районыбызның футбол командасы районыбыз тарихында беренче буларак зона кубогын яуладылар. Киләчәктә “А”дивизионында чыгыш ясаячаклар. Монысы да бәйрәмебезгә затлы бүләк бит!?

–Сүз дә юк инде. Булдырдылар. Өметне акладылар. Димәк, бу юнәлештә дә алга китеш бар. Соңгы вакытларда чынлыкта да яшь спортчыларыбыз сөендереп кенә торалар. Республика күләмендә олы җиңүләр яулаган каратэчыларыбыз, укчыларыбыз, көрәшчеләребезнең артуы горурландыра билгеле. Монда “Дельфин”ның, яңа футбол кырының өстенлекле якларын һич кенә дә билгеләп үтми мөмкин түгел. Бүгенге көндә күп кенә республикакүләм чараларның бездә узуы да яшьләребезгә уңай йогынты ясамый калмыйдыр. Алар заманча мөмкинлекләре булган бу урыннарга көннән көн күбрәк тартылалар. Аларның сәламәт яшәү юлын сайлавы безнең җәмгыятебезнең матур киләчәге дигән сүз.

–Илһам Госманович, бәйрәм уңаеннан үзегезнең теләкләрегезне дә җиткерсәгез иде?

–Барлык район халкын Республика көне белән тәбрик итәм ! Сезгә барлык эш-гамәлләрегездә уңыш, муллык,бәрәкәт, бәхет һәм саулык-сәламәтлек телим. Районыбызда яшәүче төрле милләт вәкилләре дустанә, бердәм булып яшик. Тормышларыбыз матур, бәйрәмнәребез мөбәрәк булсын!

Әңгәмәдәш–

Вазыйх ФАТЫЙХОВ.