Торакларны янгыннан саклыйк!

Торакларны янгыннан саклыйк!

Һәр елны тормышыбыз, яшәү шартлары үзгәрә. Фатир, йортларыбызда электр приборлары арта, бина интерьерларында синтетик материаллар күп кулланыла. Алар янган очракта бик агулы газ бүлеп чыгаралар.

Статистика буенча янгыннарның күпчелеге торак секторда чыга. Агымдагы елда безнең районда 18 янгын чыкты. 2 йорт, 7 каралты-кура, янды.

Ут белән саксыз эш итү, электр җиһазларыннан, көнкүреш электр приборларыннан файдалану, урнаштыру кагыйдәләрен бозу, төзек булмаган мичләр ягу– янгыннар чыгуга төп сәбәпләр булып торалар. Электр җиһазларын монтажлау, ут кертү эшләрен бары тик квалификацияле белгечләр генә башкарырга тиеш. Төрле калынлыктагы, төрле материалдан эшләнгән, изоляциясе зарарланган электр үткәргечләр куллану, аларны кадаклар ярдәмендә беркетү, үткәргечләрне боргычлап ялгау катгый тыела. Электр җылыткычларын, җиһазларын, утюгларны, телевизорны озак вакытка караучысыз калдырырга ярамый. Розеткага берюлы берничә прибор тоташтырып электр челтәренә артык көчәнеш ясау да янгыннарга сәбәп булырга мөмкин. Торак йортларда, фатирларда электр исәпләгечләргә калибрсыз саклагычлар (жучок) кую, төзек булмаган приборлардан файдалану тыела.

 Йорт янындагы участокларда, ишек алларында, янучан материаллардан төзелгән корылмалар янында учаклар ягарга ярамый. Учакларны бина, корылмалардан 50 метр ераклыкта гына тергезергә мөмкин. Бу очракта да караучысыз калдырмаска, соңыннан су яки ком белән сүндерергә кирәк. Җәйге чорда һәр торак бина янәшәсендә сулы сыешлык урнаштыру, янгын сүндергечләр булдыру киңәш ителә.

 Авыл җирлекләрендә кайберәүләр юлга ук диярлек төзелеш материаллары өеп куялар. Янгын чыккан очракта алар янгын машиналарына киртә булырга мөмкиннәр.

Хәзер җәйге каникуллар бара. Бәла-казага юл куймас өчен балаларны күзәтүсез калдырмагыз,шырпы, зажигалкаларны балалар алмаслык урыннарда саклагыз. Алар белән янгын куркынычсызлыгына багышланган әңгәмәләр үткәрегез.

 Шуны онытмагыз: йортыгызның иминлеге сезнең кулларда. Янгын куркынычсызлыгы кагыйдәләрен төгәл үтәү генә йортыгызны, мал-мөлкәтегезне янгыннардан сакларга мөмкинлек бирәчәк.

 

 

 

Балаларның иминлеге–өлкәннәр кулында

20 августтан республикабызда «Игътибар– балалар!» профилактик акциясе башланды. Бу чара жәйге каникуллардан соң балаларның юлларда, урамнарда үз–үзләрен тоту күнекмәләрен торгызуга, юл-транспорт травматизмын кисәтүгә юнәлдерелгән. 20 сентябрьгә кадәр ЮХИДИ хезмәткәрләре балаларның иминлеген тәэмин итүгә юнәлдерелгән рейдлар, укучылар, ата-аналар белән юлларда үз-үзеңне дөрес тоту буенча әңгәмәләр үткәрәчәкләр, велосипед, скутерларда йөрүче үсмерләргә карата игътибарны арттырачаклар.

Статистика мәгълүматләрен анализлау күрсәткәнчә, балалар катнашындагы фаҗигаләр саны август-сентябрь айларында аеруча арта. Озакка сузылган яллардан соң балаларга юлда йөрү кагыйдәләрен, транспорт ташкынында үз–үзеңне тоту күнекмәләрен искә төшерергә кирәк.

Агымдагы елның җиде аенда Татарстан Республикасы территориясендә балалар катнашында 352 юл-транспорт фаҗигасе булды. Аларда 13 баланың гомере өзелде, 374 бала төрле авырлыктагы тән җәрәхәтләре алдылар. Кызганычка каршы, безнең район территориясендә дә балалар катнашында 3 авария теркәлде. Фаҗигаләрнең төп сәбәпләре: куркынычсыз тизлекне арттыру һәм балаларны махсус утыргычларсыз йөртү. Балаларының гомере, сәламәтлеге турында кайгыртмаган ата-аналарның ваемсызлыгы һич аңлашылмый инде.

Бөтендөнья сәламәтлек саклау оешмасы мәгълүматлары буенча балалар өчен махсус утыргычлар юл-транспорт фаҗигаләре вакытында үлем очракларын –54, авыр травмалар алу ихтималын–92 процентка киметә. Шунысын да исегезгә төшерәбез: Россия Федерациясе Административ хокук бозулар кодексының 12.23 маддәсе 1 бүлеге нигезендә балаларны махсус утыргычсыз йөрткән өчен 500 сум күләмендә штраф салына.

 Безнең район автомобильчеләре арасында да юл йөрү кагыйдәләренең бу пунктын үтәмәүчеләр очрап тора. Җиде ай эчендә генә дә балаларны махсус утыргычсыз йөрткән, балаларга куркынычсызлык каешын каптырмаган 300 дән артык автомобильче җаваплылыкка тартылдылар.

Тиздән яңа уку елы башлана. Алда әйткәнемчә, нәкъ менә шушы чорда балаларның юл–транспорт фаҗигаләренә юлыгу очраклары бермә-бер арта да инде. Август ахырында балаларны автотранспортта йөртүчеләр арта. Кемдер баласын киендерергә шәһәрләргә бара, кемдер авылда ял иткән баласын алып кайта. Бу чорда, укытучылар, ата-аналар балаларга юл йөрү кагыйдәләрен, урамда үз-үзләрен тоту тәртипләрен даими өйрәтеп, кисәтеп торсалар яхшы булыр иде әлбәттә. Шулай ук кечкенә яшьтәге балаларны урамда, юл буйларында караучысыз калдырырга ярамый.

Җәйге сезонда ике көпчәкле транспорт чаралары катнашында аварияләр саны арта. Беренче чиратта, балигъ булмаган велосипедчылар, скутерчылар юл–транспорт фаҗигасенә сәбәпче булалар. Җәй башында Анатыштан Балык бистәсенә илтүче әйләнеч юл белән Победа урамы кисешкән чатта 12 яшьлек велосипедчы “ВАЗ–2109”машинасына килеп бәрелә. Әле ярый шофер Победа урамыннан зур тизлектә төшеп килүче велосипедчыны күреп машинасын туктата. Шулай булмаса, малайның көпчәк астында калу ихтималы да була. Бу юлы җиңелчә җәрәхәтләр белән котыла ул.

Безнең районда ике дистәгә якын скутер, мопед исәпләнә. Еш кына 16 яше тулмаган малайларда скутерга утырып юлларга чыгалар. Кагыйдәләрне белмәгәнлектән, авария ситуацияләре тудыралар. Бер скутерга икешәрләп, өчәрләп атланып йөрүчеләренә дә тап булабыз. Күп очракта мотошлемнары да булмый. Быел гына да скутерда йөрү кагыйдәләрен бозган үсмерләргә дистәдән артык беркетмә төзедек.

Дөрес, двигатель күләме 50 куб.см.га кадәр скутерларны ЮХИДИда теркәргә дә кирәк түгел, аның белән идарә итү өчен таныклык та таләп ителми. ОСАГО полисы да алып торасы юк. Әмма ул бик куркыныч “уенчык”. Аның белән идарә итүнең үз тәртипләре бар. Беренчедән үсмергә 16 яшь тулган булырга тиеш. Скутерга бары тик мотошлем киеп утырыга кирәк. Паспорт белән скутер документларын үзең белән йөртү зарур. Әгәр тиешле документларсыз скутер белән идарә итүче тоткарланса, скутер штраф тукталышка ябыла. Скутер йөртүчегә 16 яшь тулмаган булса, аңа төзелгән материаллар балигъ булмаганнар эше буенча инспекторга тапшырыла. Ул үз чиратында үсмернең ата–анасына карата административ беркетмә төзи.

Дәүләт автомобиль инспекциясе ата–аналарны балаларның куркынычсызлыгына җитди карарга чакыра. Кечкенә балаларыгыз бар икән, автомобилегезне һичшиксез махсус утыргыч белән җиһазлагыз. Ул балагыз өчен алынган иң кирәкле әйберләрнең берсе булсын. Аңа акча җәлләргә ярамый. Автокресло фаҗига була калса, балагызның гомерен, сәламәтлеген саклап калырга мөмкин бит. Ә бала гомереннән кыйммәтрәк, кадерлерәк бер нәрсә юк.

Айрат САФИУЛЛИН,

 

 

 

 

“Хрусталь күл” кубогына

18 август көнне Дон Урай плотинасы янәшәсендәге “Хрусталь күл” дип атала торган табигатьнең матур почмагында җәядән ату буенча ярышлар булып узды. Аны Татарстан республикасының җәядән ату федерациясе һәм “Рубин Гуд” Казан ату клубы оештырдылар.

Безнең районга Татарстаннан гына түгел, ә бәлки Удмуртия, Чувашия һәм Мари-Эльдан да иң яхшы җәядән атучылар килделәр. Татарстаннан Казан, Югары Ослан, Саба һәм Балык бистәсе командалары катнашты. Ярышларда төрле яшьтәге 40 ка якын спортчы көч сынашты. Турнир өч этаптан торды: беренче этапта 18 метр ераклыктагы мишеньнәргә аттылар. СОК “Дельфин”да тәрбияләнүче Илдар Имамов иң яхшы нәтиҗәләргә иреште. Ул өч спортчы белән бергәләп финалга да чыкты. Кызганычка каршы, травма нәтиҗәсендә финал турнирында үз мөмкинлекләреннән йомшаграк чыгыш ясады. Шуңа да карамастан безнең команда өченче призлы урынны алды. Икенче урынга Удмуртия укчылары чыкты, ә “Хрусталь күл” кубогына сабалылар лаек булды. Призлы урыннар алучыларга медальләр һәм “Хрусталь күл”дә бушлай балык тоту өчен сертификатлар бирелде.

Ярыш югары дәрәҗәдә оештырылган иде. Һава торышы бик уңай килмәсә дә спортчылар һәм район кунаклары канәгать калдылар. Табигать кочагында оештырылган тәмле аш-су бигрәк тә хәтерләрендә калыр инде. Бу турнирны алга таба да үткәрергә дип сүз куештылар.

 

 

 

 

Алар да ярдәмгә мохтаҗ

Мондый очрашулар безнең районда даими үткәрелеп килә. Җыелышта хөкем ителүчеләргә социаль ярдәм күрсәтү, шулай ук аларны эшкә урнаштыру, һөнәри яктан хәзерләү турында сүз барды. Социаль яклау бүлеге җитәкчесе А.Вафина җыелышта катнашучыларга хөкем ителүчеләр алырга хокуклы социаль ярдәм төрләре турында сөйләде. Шул исәптән югалган документларны торгызу, материаль ярдәм күрсәтү, хөкем ителүчеләрне вакытлыча яшәү үзәкләренә, өлкәннәр өчен интернатларга җибәрү тәртипләре, кирәкле документларны алу турында аңлатма бирде.

Мәшгульлек үзәге директоры Р.Гарифуллина эшкә урнаштыруда, яңа һөнәр алуда күрсәтелә торган ярдәм, бүгенге көндә районда була торган вакансияләр белән таныштырды.